Azərbaycan Dillər Universitetində Aprel döyüşlərinin ildönümü qeyd olunub

Azərbaycan Dillər Universitetində Aprel döyüşlərinin ildönümü qeyd olunub

Aprelin 5-də Azərbaycan Dillər Universitetində (ADU) tərcümə və mədəniyyətşünaslıq fakültəsinin təşkilatçılığı ilə Aprel döyüşlərinin ildönümünə həsr olunan tədbir keçirilib.

ADU-dan AZƏRTAC-a bildirilib ki, tərcümə və mədəniyyətşünaslıq fakültəsinin dekanı Bənövşə Məmmədova Aprel döyüşlərini ölkəmizin yaxın tarixində iz qoyan məğrurluq, qəhrəmanlıq səhifəsi olduğunu bildirib. Qeyd edib ki, Aprel döyüşləri ordumuzun gücünün, qüdrətinin göstəricisidir.

Qarabağ qazisi, jurnalist Rey Kərimoğlu universitetdə belə bir tədbirin təşkilini təqdirəlayiq hal kimi dəyərləndirib. O, Qarabağ döyüşlərində iştirak etdiyini qeyd edərək xatirələrini bölüşüb, 90-cı illərdə ağır şəraitdə ordu sıralarında xidmət edən qəhrəman döyüşçülərimizin cəbhədə göstərdiyi şücaətdən danışıb. Aprel döyüşlərini 90-cı illərdəki hadisələrlə müqayisə edən jurnalist əlavə edib ki, bu gün ordumuzun arsenalında müasir silahlar və xalqına bağlı, vətənpərvər, peşəkar zabitlər var. R.Kərimoğlu çıxışının sonunda iştirakçılara xalqımızın qəhrəman oğullarının xatirəsini daim yaşatmağı və tutduqları vəzifədən asılı olmayaraq hər zaman xalqımıza xidmət göstərməyi tövsiyə edib.

Aprel döyüşlərində xüsusi qəhrəmanlıq göstərmiş Kamil Musəvi bu döyüşləri qələbə kimi xarakterizə edib: “Xalqımız tarixboyu düşmənə qarşı müqavimət göstərib. Bu mübarizə təkcə aprel hadisələri ilə yekunlaşmır, ona görə də, biz tariximizi unutmamalı və onu daim yaşatmalıyıq. Biz Aprel döyüşlərində qələbə əldə edərək torpaqlarımızın bir qismini işğaldan azad etdik. Qarabağ ərazisində 13 strateji əhəmiyyətlə malik yüksəklik var ki, onlardan biri də ordumuz tərəfindən azad edilən Lələtəpə yüksəkliyidir”.

Tədbir tələbələri maraqlandıran sualların cavablandırılması ilə yekunlaşıb.Azertac.az

5-04-2018, 12:45



Fikirlər